La fin de n tëmp
La prima gran viera
Nce la valedes ladines vën trates ite tla prima gran viera. La front passa tres la Dolomites, dai crëps dl Lagorai nchin ti Monzoni; dala Marmoleda nchin al Col de Lana; dal Lagazuoi ala Tofanes. L chemun de Fedom vën spartì te doi pertes dala front. Tla Dolomites scumëncia na viera de posizion desdrujënta.
Ntëur la fin dl inviern dl 1916 fej i saudeies talians sauté la piza dl Col de Lana. Ti trëi ani che vën do morel iló mo milesc de saudeies talians y austriacs y l giata ala fin l sëurainuem de "Col dl Sanch".
A Corvara y a Penia (Fascia), che ie danter i luesc plu daujin ala front, vëniel metù su dai saudeies austriacs canons che possa stlupeté sëura la front ora. Ala fin dl inviern dl ann 1917 fovel morc milesc de saudeies, talians y austriacs, per la levines y per l gran frëit.
La cunseguënzes dla viera
La viera porta nce danter i ladins na gran pëina, n grum de morc y dantaldut te Fedom ie l scenar de desdruzion spaventëus. Bele ntan l inviern 1917/18 ruva zeruch i prim saudeies. Cun pazienza y artenienza scumënci a fé su da nuef cëses i tublei.
Do l armestize dl nuvëmber 1918 ruva adalerch nce ti luesc ladins i saudeies talians. La bandiera dl Tirol vën tëuta demez y l vën metù su chëla taliana. La cunseguënzes dla prima gran viera porta ala fin dla monarchia austro-ungareja. Chësc gaujea nce na for majera spartizion dl raion ladin.
L destin do la viera
Cun l Tratat de pesc de Saint Germain di 10 de setëmber dl 1919 ruva Sudtirol sota la Talia. L Prëner devënta l cunfin danter l'Austria y la Talia.
I ladins uel resté sota l'Austria y se damanda de unì recunesciui sciche na etnia per si cont. Tl prim ti univa la pulitica dl guviern talian ancontra ala populazions di raions sotmetui. Chësta situazion ne n'à nia durà giut, ajache riesc do à tëut l pudëi l fascism.
L ann 1923 porta Ettore Tolomei, l cumisser per la rujeneda y cultura te Sudtirol, dant si program per la talianisazion de chësc raion. L ie udù danora che l talian vënie adurvà te scola, tla toponomastica, tla vita da uni di y tla relazions cun l'aministrazion publica, a dann dl'autra rujenedes.
