Biblioteca

Cun le passé di agn él gnü arjigné ite a San Martin na biblioteca spezifica de n cer pëis, te chëra che al é da abiné na gran compëda de libri ladins o scric te d'atri lingac che trata dla Ladinia.
Al é ince da ciafé libri furlans y grijuns y publicaziuns di vijins todësc, talians y slovens. Implü él na seziun cun libri de linguistica, sides generala che ladina, o che reverda ince d'atres comunités linguistiches.

Ti salamënc dl Istitut te Sëlva él gnü arjigné ite na picia biblioteca cun i libri de majera importanza sura le lingaz, la storia y la cultura ladina. Le catalogh di libri é gnü reporté sön computer y a chësta manira él deventé scialdi saurí da abiné na publicaziun, ince sce an sá ma na pert dl titul o dl inom de n autur.

Por ci che á da nen fá cun l'archif, él gnü abiné adöm na certa compëda de documënc originai, en buna pert ince copies de documënc fora di archifs dles calonies.

Le material fotografich, important sides por ci che reverda la cuantité che ince la cualité, é en gran pert gnü abiné adöm y registré sön computer, alisiran insciö dassënn le laur da chirí na fotografia.

Por podëi chirí y ciafé i libri tla biblioteca dl Istitut Ladin Micurá de Rü ince da ciasa demez, él gnü cherié la biblioteca on-line. Insciö po vignun ciafé libri do argomënt, do titul o do autur zënza jí fora de ciasa.