L’identità ladina

 
L ann 1870 n valgun prevesc dla Val Badia, de Ampëz y de Fedom mët su, tl seminar de Persenon, na lia che se dà ju, danter l auter, cun la rujeneda y cultura ladina: la "Naziun Ladina". L flurësc for deplù l nteres per l mond ladin: filologs y linguisć se dà ju cun nrescides n cont dla rujeneda y dla storia ladina. L vën metù su lies y n mët a jì manifestazions cultureles. La cumenanza ladina scumëncia à tò cuscienza de si identità.

L ann 1946 vëniel metù su ufizialmënter la Union di Ladins de Gherdëina y tl 1948 la Uniun di Ladins dla Val Badia. Tl 1951 vëniel fat ora ufizialmënter l inuem Union di Ladins dla Dolomites. La Union di Ladins de Fascia vën metuda su l ann 1955. Tl 1957 la Union di Ladins dla Dolomites sposta ufizialmënter si sënta da Bulsan tla Cësa di Ladins a Urtijëi, y da iló inant ie si inuem Union Generela di Ladins dla Dolomites. Te chësta cësa iel nce l Museum de Gherdëina (1954).