La scunanza di ladins

Ala fin dla viera sperova mo n grum de zitadins de rujeneda tudëscia y ladina che l unissa a se l dé na reunificazion cun l Tirol dl'Austria. L Tratat de Paris dl 1946, danter la Talia y l'Austria, ne tën nia cont di ladins.
L ann 1946 se damanda l muvimënt politich "Zent Ladina Dolomites" l recunescimënt ufiziel dla grupa etnica ladina. La autoriteies talianes ne ti dà nia drë ahta a chësta pertendudes. Nia ne porta l sustëni dla Südtiroler Volkspartei (SVP) y la petizions ai aleac che à venciù la viera.
Ai prim de jené dl 1948 va n droa la Costituzion nueva dla Talia. L ie udù danora che la region Trentin-Sudtirol giate n si statut speziel. I ladins de Gherdëina y dla Val Badia vën numinei tl articul 87 de chësc Statut d'Autonomia.
L ann 1951 recunësc l articul 69 de na norma de atuazion al Statut d'Autonomia che la grupes de rujeneda dla provinzia de Bulsan ie chëla tudëscia, taliana y ladina.
L ann 1964 vëniel metù su la diozeja de Bulsan-Persenon. I cunfins dla diozeja nueva va nsci a una cun i cunfins de provinzia. Ampëz, Fedom y Col passa ala diozeja de Belun. Gherdëina ruva pra la diozeja de Bulsan-Persenon y Fascia resta sota Trënt.
L segondo Statut d'Autonomia per la region Trentin-Sudtirol ("Paket" o "pacchetto") dl ann 1972 tlopa adum duta la normes de scunanza che à da nfé cun la mendranza tudëscia y ladina tla provinzies autonomes de Bulsan y de Trënt.