Select your language

Micurá de Rü é nasciü ai 4.12.1789 tla vila de Rü a San Ciascian sciöche fi plü jonn de na familia da paur de cater mituns. La scora elementara ál frecuenté te so paisc nadé y dedô él jü a Porsenú a studié inant tl ginase. Do avëi stlüt jö le lizeum s'á Micurá tigní sö te de plü cités, insciö a Desproch, a Trënt y a Salzburg por porté inant sü stüdi tles facoltés de filosofia y teologia.

Ai 28.08.1814 á Micurá de Rü ciafé a Salzburg la consacraziun da prou. Sü pröms agn de laur á siur Micurá de Rü passé te deplü cöres tl'Austria sciöche caplan. Plü tert ál spo surantut n post sciöche caplan di soldas y n'inciaria da insigné te n istitut militar por l'educaziun de mituns a Milan. Por n pez é siur Micurá ince sté letur de talian tl'université da Desproch. Do agn de maratia é siur Micurá de Rü mort ai 29.03.1847 a Wilten dlungia Desproch.

 

Sura sü dovëis da prou fora, nudrî Micurá de Rü ince na gran pasciun por so lingaz dla uma, le ladin.
Dl 1833 ál scrit sciöche pröm na gramatica ladina, intitolada "Versuch einer deütsch-ladinischen Sprachlehre". Le particolar de chësc laur é l’impostaziun y vijiun dl autur defrunt al ladin, nia caraterisada da na orenté de conservaziun stara, mo de na elaboraziun dl ladin che tëgnes cunt di bojëgns di tëmps. Süa idea é chëra de cherié n lingaz de scritöra unifiché por düc i Ladins dles Dolomites. A onú y recordanza de siur Micurá de Rü porta dal 1976 incá l'Istitut Ladin a San Martin de Tor l'inom de chësta gran personalité ladina.