L’Assessur por la Scora y Cultura Ladina, la Direziun Intendënza y Cultura ladina y l’Istitut Ladin Micurá de Rü

á le plajëi da Ves invié ala conferënza stampa che gnará tignida

en vëndres, ai 28 de forá 2025, dales 10:00

tl Salf stampa dla Provinzia de Balsan tl Palaz Widmann, Plaza Silvius Magnago 1

por la surandada ofiziala dl

Archif Storich Fotografich Zardini

al Istitut Ladin Micurá de Rü da pert dla proprietara Valentina Zardini.

Le fin de chësta surandada dess ester chël da valorisé n patrimone cultural de gran valü-ta, n archif de milesc de fotografies storiches fates da de plü fotografs dla familia Zardini d’Ampëz, da mëte man dai retrac de Raffaele Zardini y de süa fomena Antonia Verocai Zardini, ti agn incër le 1900.

L’arpejun y le talënt de Raffaele y Antonia ê spo gnüs surantuc dai fis, Rinaldo y Roberto, che é jüs inant cun le laur da fotografs, no ma de Cortina d’Ampëz, mo de döt le raiun dolomitich.

Stefano Zardini, le fi de Roberto, á arpé l’Archif storich dl pere, dl berba y di neni, y é jü inant cun süa misciun por döta la vita. Scemia che le laur da fotoreporter le cundejô gonot dalunc da ciasa, él dagnora gnü zoruch, dales munts che ël amâ, y un süa gran pasciun por la storia d’Ampëz y por la cultura dles valades dolomitiches, ti ál dé inant vita al Archif Storich Fotografich Zardini. Sües fotografies y creaziuns artistiches é stades oget de publicaziuns y mostres fotografiches te tröc Paisc dl monn, mo al n’á mai lascé fora l’ocajiun da rapresenté sües munts, les Dolomites, y la vita de süa jënt cun mostres, films y publicaziuns che é dagnora gnüs tuc sö cun gran interes.

Da canche Stefano Zardini á messü lascé chësc monn tl 2019, s’á süa fomena Valentina cruzié da ciafé n post che foss adaté por chësc patrimone cultural, olach’al ne vëgn nia ma tigní sö bun, mo ince valorisé cun iniziatives che vais a öna cun les idees de so om, por le mantigní vi ince tl dagní.

Al nes fajess plajëi sc’i podesses nes confermé Osta presënza por telefon
(0474 / 523110) o tres e-mail: info@micura.it