Balsan, ai 22 de otober 2021
Nrescides letereres y letures critiches
Scric en onur de Ulrike Kindl por sü 70 agn
“Avëi 70 agn n’é nia n mirit, la natöra á orü insciö. I sun dër contënta d’avëi complí 70 agn en sanité y dantadöt che mia mënt funzionëies ciamó.” Ulrike Kindl do ch’al ti é gnü surandé i Scric en so onur
En gaujiun dl 70° compliagn dla germanista y storica dla cultura Prof. Ulrike Kindl él gnü dé fora i Scric en so onur dal titul “Lektüren und Relektüren/Leggere, riflettere e rileggere/Nrescides letereres y letures critiches”. Cun chësta racoiüda de articui ó L’Istitut Ladin “Micurá de Rü” rengrazié Ulrike Kindl por le laur scientifich ch’ara á fat ti ultims dezens por fá conësce la cultura ladina – dantadöt cun so stüde critich sura les liëndes dles Dolomites – y la storia complessa de Südtirol.
Da realisé la publicaziun “Lektüren und Relektüren/Leggere, riflettere e rileggere/Nrescides letereres y letures critiches”, é i curadus Leander Moroder, Hannes Obermair y Patrick Rina stá bogn da trá ite n bel numer de compagns, colegs y “compagns de aventöra” de Ulrike Kindl; chisc é: Leo Andergassen, Roland Bauer, Fabio Chiocchetti, Alessandro Costazza, Nicola Dal Falco, Michael Dallapiazza, Siegfried de Rachewiltz, Ivan Dughera, Vincenzo Ferrone, Marco Forni, Cristina Fossaluzza, Joachim Gatterer, Adina Guarnieri, Andreas Hapkemeyer, Hans Heiss, Leo Hillebrand, Tiziana Lippiello, Guido Massino, Andreas Oberhofer, Hannes Obermair, Günther Pallaver, Werner Pescosta, Josef Prackwieser, Patrick Rina, Paul Rösch, Marcello Soffritti, Martha Stocker, Elisa Tappeiner, Antonio Trampus, Oswald Überegger y Martha Verdorfer. Les tröpes tematiches respidlëia la varieté di interesc y di ciamps de inrescida dla Festejada: articui leterars y storics-culturai se moscëda cun essays de linguistica, de storia contemporana y de storia dla mentalité. Le laur scientifich de Ulrike Kindl – scrí i curadus tla prefaziun dl liber – é da dagnora incá caraterisé da n spirit lëde y sapiënt, zënza orëi por forza insigné val’.
I Scric en onur a Ulrike Kindl ti é gnüs surandá ala Festejada ai 22 de otober 2021 en gaujiun de na festa tl Parkhotel “Laurin” a Balsan.
“Lí, ponsé do y lí danü – chësc modus operandi fajará inant pert de mia vita da vigni de, cina che n destin generus ti dará l’energia a mia mënt. Degügn ne m’á mai damané da fá na vita inteletuala. Mo n iade che te mëtes man da le fá, spo devëntel sciöche na dependënza: te n’os nia plü te archité”. Ulrike Kindl do ch’al ti é gnü surandé i Scric en so onur.
Le Presidënt dla Provinzia Autonoma de Balsan Arno Kompatscher á definí Ulrike Kindl, te so messaje de salüt, na dërta europea che cun so impëgn scientifch á fat tröp por le barat cultural tla Mitteleuropa. “La gran convinziun europeica che les cultures nes liëia y che les desvalianzes nes liëia adöm se damana ch’an conësces bun les desvalianzes. Cun so contribut scientifich, ti á la Prof. Kindl dé inant chësc savëi ai sudtirolesc”, á Kompatscher sotrissé. Ince l’Assessur provinzial ala Cultura ladina, Daniel Alfreider á sport complimënc y parores de rengraziamënt: “La Prof. Kindl ti á dé n’interpretaziun nöia y critica ales liëndes dles Dolomites. Le so é sté n laur de inrescida y divulgaziun de morvëia tipich dla vita scientifica de Ulrike Kindl”. Manfred Vallazza, Assessur regional ales mendranzes linguistiches, á laldé Kindl por so laur a bëgn dla mendranza ladina te Südtirol y tl Trentin.
Ulrike Kindl é nasciüda a Maran ai 16 de otober 1951. Do le lizeum classich todësch “Beda Weber” a Maran, ára studié germanistica y slavistica tl’Université Ca’ Foscari a Auniejia y tl’Université “Humboldt” a Berlin Ost. Dal 1974 al 2011 ára insigné tl’Université a Aunejia, dal 1986 incá sciöche dozënta de lingaz y leteratöra todëscia. Sü maius interesc tl’inrescida é la filologia medievala, l’iconografia simbolica, l’antropologia culturala y le folclor alpin. Ara é colaboradëssa scientifica di Istituc Ladins “Majon di Fascegn” (Sèn Jan, TN) y “Micurá de Rü” (San Martin de Tor, BZ). Danter sües publicaziuns plü importantes él da alzé fora: Kritische Lektüre der Dolomitensagen von Karl Felix Wolff (1983–1997); Storia della letteratura tedesca. Dal settecento alla prima guerra mondiale (2001); I linguaggi e la storia (2003, con A. Trampus); Sirena bifida. Bilderwelten als Denkräume (2008); Miti ladini delle Dolomiti (2012–2014, con N. Dal Falco); Considerazioni sull’Alto Adige 1918–2018 (2018, con P. Rina e T. Rosani); Il Codice Brandis (2018–2021, con A. Baccin); Il tempo sospeso. L’Alto Adige 1918–1922 (2020, con H. Obermair). Ulrike Kindl á ciafé tl 2016 la crusc de mirit dl Land Tirolpor so gran laur scientifich.
{2jtoolbox gallery id:90}
