Select your language

PEST LETERER NAZIONEL “SALVA LA TUA LINGUA LOCALE” 2020

Marco Forni vënc tla sezion “Premio Tullio De Mauro” cun l Dizioner Talian – Ladin de Gherdëina dat ora dal Istitut Ladin Micurá de Rü

L fova 270 i autëures che à tëut pert al’otava edizion dl cuncors (che fej referimënt al 2020) y ndut 61 i finalisć a se ndesfidé per vëncer te una dla ot sezions dl pest. 

L pest nazionel ie unì metù a jì dal’“Unione Nazionale delle Pro Loco” (Unpli) y da “Ali Autonomie Locali Italiane – Lazio” (ALI Lazio) y ie unì urganisà n cunlaurazion cun l “Centro Internazionale Eugenio Montale” y per la sezion “Scola” cun l’Ong “Eip-Scuola Strumento di Pace”.

“Scuvierjer da nuef y valorisé la rujenedes manco destendudes ora ie te chësc mumënt storich mo de majera mpurtanzaper nosta sozietà, coche desmostra nce l numer chersciù de partezipanc al cuncors leterer nazionel. Se identifiché cun latradizions dl ncësa y cun i valores che chëstes nes dà ie segurmënter n vantaje mplu ntan l pruzes de fé su da nuef l mond tl tëmp do la pandemia, ulache la cumenanzes, scumencian dala mëndres, muessa vester tl zënter”, dij Bruno Manzi,presidënt dl Cunsëi Nazionel de “Ali - Autonomie locali italiane”.

La sezion che tol ite essay, tesi de laurea, studies sun dialec y/o rujenedes dl post y dizioneres ie dedicheda a Tullio De Mauro, nteletuel y linguist scialdi cunesciù che, nchin ala fin, ie stat nce presidënt d’unëur de “Salva la tua lingua locale”. 

La giuria dl pest per l’edizion 2020 ie metuda adum da duzënc y linguisć: Franco Brevini, Patrizia Del Puente, Luigi Manzi, Plinio Perilli, Giancarlo Schirru, Giovanni Tesio, Salvatore Trovato (presidënt) y Angelo Zito. Sëuraprò ie i lëures linguistics unic valutei da na giuria de linguisć aposta metuda adum da: Salvatore Trovato (Università de Catania), Luca Lorenzetti (Università della Tuscia), Giovanni Ruffino academicher urdiner dl’Accademia della Crusca (emeritus – Università de Palermo). L presidënt d’unëur dl pest ie Giovanni Solimine, diretëur dl departimënt de “Lettere e Culture Moderne” dl’Università “la Sapienza” de Roma y presidënt dla “Fondazione Maria e Goffredo Bellonci” che se dà ju cun la promozion dla letura y urganisea l “Premio Strega”. 

L premià auza ora che chësc recunescimënt de gran mpurtanza, che à tl titul l inuem de na gran persona de ejëmpl sciche De Mauro, ie da partì cun si grupa de lëur straurdinera, da liejer do sun la plata dancà dl’opra lessicografica. Duta la grupa l à acumpanià, cun ueia de fé y prufesciunalità, sun l troi ërt ma faszinënt per ruvé a piz cun chësta opra lessicografica.

Luca Serianni, academicher di Lincei y dla Crusca, ti à fat avëi si cumplimënc plu senzieres al autëur “per chësc recunescimënt mpurtant y scialdi merità. L ie na gran arjonta, per ti lëur y per duta la cumenanza ladina de Gherdëina”. Tla paroles danora dl “Dizioner” scrites da chësc gran storicher dla rujenedes lijons: “I studiëusc arà plu rejons per ti sentì gra a Marco Forni per chësta si opra dënia y sfadiëusa; y l medemo vel per si cunzitadins, sce penson al gran valor d’identità che n monumënt lessicografich sciche chësc à per la cumenanza linguistica de referimënt”.

“Scebën che l 2020 ie stat n ann plën de melsegurëzes, ons abù trueps che à fat pea. Rengrazie de cuer duc i cumëmbri dla giuries defrëntes per l gran lëur che i à fat, cumplicà dala deficulteies dla situazion. Da nosta pert se purverons inant mo de plu acioche l gran patrimone linguistich de nosta nazion vënie scunà, valorisà, ma dantaldut adurvà per cunté, cun duta la sfumadures che l ie, nce dut l adum de emozions, esperienzes y deficulteies dl’epoca storica scialdi cumplicheda te chëla che son iust laite” auza ora l presidënt dl’Unpli, Antonino La Spina.

La zeremonia de premiazion tradiziunela ududa dant per mez dezëmber 2020 a Roma tla Sala della Promoteca dl Campidoglio ie unida spusteda y unirà a se l dé danter setëmber y utober de chëst ann, te na data mo da fé ora, speran che la cundizions dla pandemia lasce pro de mëter a jì chësta uneranza.