Drap dla Pascion, prejentazion garateda a Urtijëi

Na publicaziun nueva de Verena Niederegger Senoner descuer la storia y l messaje dl Drap dla Pascion dla dliejia da Sacun.

L Drap dla Pascion dla dliejia da Sacun à na storia de 400 ani y da bele 50 ani iel cunservà tl Museum Gherdëina a Urtijëi. L drap ie unì realisà da n artist nia cunesciù y l ie partì su te 24 scenes che conta la Pascion y la Ressurezion de Gejù Crist. Si storia y si carateristiches prinzipeles ie tl zënter de na publicaziun nueva dal titul "Das Fastentuch von St. Jakob in Grödern/Il telo quaresimale di San Giacomo in Val Gardena" che ie unida prejenteda dantier, ai 15 de merz, dal'autora Verena Niederegger Senoner tl self dla calonia de Urtijëi, che à restaurà y studià a fonz l drap.

I resultac dla nrescida ie śën dan man y ie unic publichei n cunlaurazion cun l Istitut Micurà de Rü y l Museum Gherdëina. L liber nuef rejona dla cunservazion y dla restaurazion dl Drap dla Pascion che ova tl tëmp dl Medieve na funzion drët mpurtanta ntan l ann liturgich y dantaldut ntan la Cuarëisema. Nsci univa l drap dla pascion adurvà per abelì l autere y l ova nce la funzion de cunté la storia dla bibia per la jënt che ne fova nia bona de liejer. L sëul drap dl Südtirol che se à mantenì per ntier nchin ncuei ie chël cunservà tl Museum Gherdëina a Urtijëi. Dla curnisc musichela s'à cruzià la grupa de archëc de Gherdëna.

La publicazion ie unida scrita per talian y tudësch y n possa la cumpré tl Istitut Ladin Micurà de Rü (Sëlva y San Martin) y tl Museum Gherdëina a Urtijëi. L liber costa 10 euro. Oradechël pieta l Museum vijites cun spligazions dl drap n la juebies di 23 y 30 de merz sciche nce ai 6 d'auril, for dala 16.00.

{2jtoolbox gallery id:63}