Select your language



La aventures de Pinocchio - softcover (ladin de Gherdëina)

La aventures de Pinocchio - softcover (ladin de Gherdëina)
18,00 €

Spezificaziuns

978-88-8171-125-3
Collodi, Carlo
Istitut Ladin Micurá de Rü
2017
LAD
180
storia de n manduchel - traduzion tl ladin de Gherdëina

L fova n iede...
„N rë!" dijerà riesc mi pitli letëures. No, mutons, v' ëis falà. L fova n iede n tlapon.
L ne fova pa nia n tòch de lën dur, ma n tòch de lën scëmpl da tassela, de chëi che n tiza d' inviern te fëur y te furnel a mpië l fuech y a sciaudé ite la majons. Ne sé nia coche la fova jita, la fova mefun stata nsci che n bel di fova chësc tlapon capità te berstot de n tel vedl tistler, che ova inuem bera Tone, nce sce duc ti dijova moster Ciarieja, pervia dla piza de si nés che fova for lucënta y paloma sciche na ciarieja madura.
Pernanche moster Ciarieja ova udù ch' l tlapon, fovel unì dut dala bonaluna y ntant che l se sfriova la mans dala cuntentëza, barbutovel achiet:
„Chësc tòch de lën me ie capità drë adrët: l tole pa da ti fé ite l pe a na tel' pitla mëisa."
L ova tëut l manarin da n bon tai per mëter man de l scurzé y de desmazé, ma canche l fova sun chëla de ti dé l prim colp, fovel restà cun l brac fërm mpontassù, ajache l ova audì na tel' pitla usc fina che ti ova dit prian:
„Ne sté a me ciavaté tan dassënn!"
Nmaginëve ma coche l ti ova sapù a ch' l bon vedl de n moster Ciarieja!

 

L ie na gran legrëza per nëus pudëi prejenté chësta traduzion dl' opra tlassica dla leteratura per mutons de Carlo Lorenzini - Collodi, „La aventures de Pinocchio, storia de n manduchel", ciancià te truepa rujenedes y śën nce per ladin.

La traduzion dl liber per badiot, gherdëina, fascian y fodom ie da raté sciche un n lëur y l resultat dla bona culaburazion danter la istituzions ladines. Sciche uni traduzion ie nce chësta stata na ucajion per l ladin y per si variantes de deventé lëuratuere de nrescida y mesun per jì plu sot tla rujeneda. La ie stata n luech de sperimentazion y de reflescion lessichela y gramatichela. L ie nce stat mesun valorisé la richëza dl cor d' ujes de nosta rujeneda.

Nosta speranza ie che chësc roman de furmazion tla rujeneda dl' oma vënie liet tla scoles ladines. Speron che chësc Pinocchio che rejona ladin ruve nsci danter i pitli dla Ladinia y si jënt cun si fé bispul y da ulëi bon, descedan l nteres de chëi da tlo y nce de letëures da oradecà.