Select your language



Les aventöres de Pinocchio - softcover (ladin dla Val Badia)

Les aventöres de Pinocchio - softcover (ladin dla Val Badia)
18,00 €

Spezificaziuns

978-88-8171-124-6
Collodi, Carlo
Istitut Ladin Micurá de Rü
2017
LAD
180
cuntia de n buratin - traduziun tl ladin dla Val Badia

Al ê n iade...
„N re!" dijará atira mi pici leturs. No, mituns, i s' ëis falé. Al ê n iade n ­tlapun.
Al n' ê nia n toch de lëgn che varô tröp, mo n toch de lëgn scëmpl tut jö de na liacia, de chi ch' an tiza d' invern te furn o te fornel, da impié sö le füch o da scialdé les ciamenes.
I ne sá nia coch' ara é jüda, ara é mefo stada insciö, che n bel de ê chësc tlapun capité te bercstot de n tistler vedl, che â inom berba Tone, ince sce düc ti dijô berba Cherscia, porvia ch' al â la piza dl nes tres liciorënta y paroma sciöche na cherscia madüda.
Pornanche berba Cherscia â odü chël tlapun âl ciafé la buna löna, y tratan ch' al se sferiâ les mans dala contentëza, barbotâl daplan:
„Chësc toch de lëgn m' é propi capité adaldërt: i le toli pa da ti fá ite le pe a na te picia mësa."
Zënza bazilé âl atira tut le manarin taiënt por mëte man da scorzé y da scadré le tlapun. Mo canch' al ê por ti dé le pröm colp, êl resté cun le brac impuntassö, deach' al â aldí na picia usc fina fina che periâ:
„Ne sté a me ciavaté tan dassënn!"
Imaginesse madër coch' al ê resté chël bun vedl de n berba Cherscia!

I sun braui da podëi presenté chësta traduziun dl ­classich dla leteratöra por mituns de Carlo ­Lorenzini – Collodi, „Les aventöres de Pinocchio, cuntia de n buratin", traslaté te tröc lingac y sëgn ince por ladin.

La traduziun dl roman por ladin dla Val Badia, gherdëna, fascian y fodom ó se presenté sciöche n laur su, sciöche resultat de na colaboraziun che porta de bogn früc danter les istituziuns ladines. Sciöche vigni traduziun é ince chësc laur sté n' ocajiun por le ladin y por sües variantes, n laboratore de inrescida y de aprofondimënt linguistich, n post de sperimentaziun y de reflesciun lessicala y gramaticala y de valorisaziun dla richëza de inoms y de parores de chësc lingaz.

I se dejidrun dassënn che chësc roman de formaziun tl lingaz dla uma devëntes n liber de letöra dles scores ladines. I sperun porchël che chësc Pinocchio che baia ladin röies danter i mituns dla Ladinia y süa jënt, cun so fá busiënt y spontan, descedan la vöia da lí di jogn ladins y de chi che impara da baié ladin.