ASMARA 2024: stii y formes se liëia adöm tla mostra personala de Simon Joseph Rubatscher
ASMARA 2024: stii y formes se liëia adöm tla mostra personala de Simon Joseph Rubatscher
Ai 25 d’agost s’ál stlüt les portes de „Asmara 2024“, la cuarta de cin’ mostres metüdes a jí tratan l’isté tl salf dl Istitut Ladin Micurá de Rü. A spetadus y spetadësses ti él gnü metü dant les operes de Simon Joseph Rubatscher, artist y poet da Longega.
Coche le titul „Asmara“, dal inom dla capitala dl’Eritrea, patrimone dl’Unesco por le lian de stii tl’architetöra, anunziâ bele danfora, á ince chësta mostra tut ite stii y operes dër desfarëntes. Le titul dô ince recordé le dotur Call, parënt dl artist che á vit y lauré por tröc agn te chë cité.
La vernissage, tignida ai 9 d’agost é stada n suzes, ci che desmostra la vöia da s’incunté te „ocajiuns culturales“ y l’interes por l’ert ladina. Le presidënt dl Istitut Elmar Castlunger á danter l’ater sotrissé l’importanza da ti dé lerch y da sostigní i artisć y les artistes.
Chi che conësc Simon J. Rubatscher sá che süa archirida, do n’espresciun, do formes, tecniches y corusc che lasces fora y trasmëtes ci ch’al ó comuniché, ne s’á mai archité. Tla pert plü tecnica, mecanica dla mostra êl da odëi les serigrafies sön lëgn di önesc astronauc todësc che á metü pe söla löna. Chedri de corú arjënt conesciü por ester corú dl’inovaziun. Daimproia gnô les operes tres plü astrates. Grafiches ispirades al gran maester David Carson, che ascognô scenes de vita, parores, corusc scraiënc y imajes de cosses o de porsones. L’ultima pert ê acuarei lisiers contrastá cun formes definides che respidlâ bun n pinsier dl artist: „Me me conësci ma tan co la spaorizia co vën a cianté sön sorá da doman adora“.
Vijitadus y vijitadësses á podü se dé jö cun chësta domanda esistenziala amiran les operes dl artist, deache se dé jö cun l’ert pó orëi dí tl medemo momënt ince se dé jö cun se instësc.
Lucia Piccolruaz
