Presentazion dl liber „Ert tl Cunsëi dla Provinzia Autonoma de Bulsan“
Operes d’ert de artistes y artisć dla trëi grupes linguistiches ladin, tudësch y talian, sëuradut di raions de Sudtirol, ma nce da oradecà, arichësc la colezion dl Cunsëi provinziel a Bulsan.
Passa cënt ie la operes d’ert danman tl palaz dl Cunsëi provinziel de Sudtirol y chësta colezion ie metuda adum, ora che da afrësc y scipes de Murano, nce da lëures de artistes y artisć renumei y tlo nen iel na bela cumpëida nce de ladins.
Chësta arpejon artistica preziëusa ie śën unida laureda ora y cataloghiseda te n liber presentà tl palaz dl Cunsëi provinziel a Bulsan n gaujion dl Di dl’Autonomia de Sudtirol, ai 5 de chësc mëns, da pert dl presidënt dl Cunsëi provinziel Arnold Schuler cun l prufessëur dl’università de Dispruch y storich d’ert Markus Neuwirth che à deriet i lëures y curà la publicazion y ala cunservadëssa provinziela Karin Dalla Torre.
Per ti dé la valuta y la mpurtanza che chësta operes se merita y acioche les posse ti ruvé permez a n majer publich ie la publicazion de ades 250 plates unida realiseda te cater lingac – tudësch, talian, ladin (dla Val Badia y gherdëina) y nglëisc –, cun tratac da pert de esperc renumei y leprò fotografies a culëures te na ressoluzion auta. La traduzions tl idiom ladin dla Val Badia y te chël de Gherdëina ie unides fates dala culaburadësses y dai culaburadëures dl Istitut Ladin Micurá de Rü. Ala realisazion dl proiet, cuordinà da Othmar Thaler, ti iel unì dat pëis ala elaburazion scientifica dla colezion y perchël iel unì nciarià, ora che i esperc numinei dessëura, mo l storich, archivar y curadëur de mostres Hannes Obermair, l scritëur y espert d’ert dla scipa Mauro Sperandio y la storica d’ert Francesca Taverna.
Da abiné tla publicazion iel nce n valgun lëures de artistes y artisć ladins - de chisc nes à velun danz bele lascià - cun na si curta biografia artistica: Lois Irsara (+2014), Monica Leonardi, Albert Mellauner, Angel Morlang (+2005), Gottfried Moroder (+2016), Viktor Moroder (+1994), Raimond Mussner, Roland Senoner, Markus Vallazza (+2019).
L liber “Ert tl Cunsëi dla Provinzia Autonoma de Bulsan“ pòn cialé do online sun la plata web dl Cunsëi provinziel y tosc nce tla biblioteches de dut Sudtirol.
L afrësch de Karl Plattner che fej bela paruda tl salamënt dl Cunsëi dla Provinzia a Bulsan, cun si 100 m cuadrac de spersa, ie y resta l’opera prinzipela tl palaz de guviern de Sudtirol. Dansù l titul dl cuiertl dl liber.
Dancà da mc: l curadëur dla publicazion nueva Markus Neuwirth, l presidënt dl Cunsëi provinziel Arnold Schuler y la cunservadëssa provinziela Karin Dalla Torre.
