CLAM 2021
“Na inrescida soziolinguistica por verifiché la situaziun di lingac de mendranza tl raiun dla regiun Trentin-Südtirol y por dessigné tl dagní intervënc de politica linguistica ciamó plü tocá”
Dal mëis de messé 2021 inant gnarál metü a jí ti raiuns ladins, mochen y zimber na inrescida soziolinguistica metüda a jí dala Provinzia de Trënt, cun le coordinamënt scientifich dl’Université de Trënt – rapresentada dala Prof. Patrizia Cordin -, le sostëgn tecnich sön le post da pert di Istituc Ladins, mochen y zimber y la partezipaziun dla Regiun Trentin-Südtirol. L’inrescida é gnüda sostignida dassënn dai aministradus di comuns y dales istituziuns de referimënt tla Conferënza dles mendranzes dl 2019.
L’inrescida nasc por orenté di medemi raiuns y vëgn identificada cun l’acronim CLAM, che mët adöm les prömes lëtres de “cimbro”, “mocheno” y ladin. Ara se trata de n’inrescida soziolinguistica che vëgn fata tolon sö dac sön le post, che autovalutëia les competënzes, les usanzes y i comportamënc de chi che baia ti confrunc dl lingaz. Le fin é lié a na prospetiva d’atenziun por les desvalianzes, porciodí che les comunités de mendranza rapresentëia oportunités y richëza por döta la Regiun.
Al proiet colaborëiel esperc soziolinguisć conesciüs a livel internazional: le Prof. Fernando Ramallo dl’Université de Vigo tla Galizia, Spagna, y le Prof. Gabriele Iannaccaro dl’Université Biccocca da Milan, cun l’aiüt dl soziolinguist computazional Vittorio Dell’Aquila. N’inrescida de chësta sort ê bele gnüda fata dan da 20 agn, mo ara reverdâ ma les valades ladines; chësta da sëgn daidará da capí la realté da deplü lingac a livel regional. I informadus sará porsones dai 14 cina 80 agn, partis sö te 6 categories de eté, aladô dl’evoluziun dla vita dla porsona – dala scora al’université, dal tëmp de laur cina la ponsiun. Un di punc de forza de chëstes inrescides é ch’ares stimolëia l’aprofondimënt scientifich, mo dantadöt ch’ares pormët da dessigné, sön la basa di resultac che vëgn fora, intervënc de politica linguistica spezifics por sconé miú ch’ara vá, por fá crësce y ti dé n dagní al ladin, al mochen y al zimber.
Tles proscimes edemes gnará insciö contatada na pert dla popolaziun dles valades – apresciapüch 3.000 porsones indöt – da jogn dl post che jará a damané fora. Les porsones gnará trates ite te chësta inrescida soziolinguistica, y dará so contribut por definí tan sagns che i lingac de mendranza é tla Regiun. I resultac dla inrescida sará a desposiziun tl 2022.
I Istituc ladins, mochen y zimber s’aoda che i informadus chiris fora por respogne ai chestionars dais döt l’aiüt y la desponibilité ch’ara vá por fá a na moda che chësc proiet tan important garetes sciöch’al alda.
Por d’atres informaziuns pón contaté:
Por Fascia: Istitut Cultural Ladin “Majon di Fascegn”
Por Badia y Gherdëna: Istitut ladin Micurá de Rü
Por Fodom e Ampëz: Istitut Ladin “Cesa de Jan”
Por la Val di Mochegn: Bersntoler Kulturinstitut/Istituto culturale mòcheno
Por Luserna y i zimbres: Istituto Cimbro/Kulturinstitut Luser
